Un final para Juan Luis Cebrián

O grupo PRISA afoga en débedas (é a súa linguaxe). Venderon Localia e queren desfacerse de outros moitos "activos", mesmo El País, pero as ofertas que reciben son humillantes. Din que Zapatero está disposto a soltar pasta, pedindo a cambio, en bandexa de prata, a cabeza de Cebrián. Bueno, o da bandexa de prata é unha licencia poética fora de lugar, porque o fundador e ex director do xornal, en contra do que el mesmo pensará, non ten a proxección histórica do Bautista, e a súa morte non a vai contar Oscar Wilde. O que pode facer é pedir un crédito nunha sucursal do Santander (queremos ser tu banco) e pagarlle a Vargas Llosa para que se aveña a escribirlle a necrolóxica. E confiar en que Emilio Botín esa mañán remate cun hándicap satisfactorio no campo de golf.