A estela do rosmón

Escoitamos música como cunha venda. Palpando, probando, escollendo ás veces só polo nome ou por unha reseña que lemos en calquera xornal. Tócalle o turno a Anni B Sweet, que semella unha secuela de Russian Red. ¿Secuela ou estela? Secuela; Russian Red góstanos, esta xa se pasa de naïf, demasiadas orquídeas da inocencia humedecendo un prado demasiado verde e vaporoso.
O de MySpace será útil, pero a nós resúltanos repelente toda esa chatarra gráfica, o deseño abigarrado arredor dun número de teléfono. O MySpace desta rapaza é como as súas cancións, demasiados veos de tule branco.

Quén sabe, este ano o mesmo nos animamos e imos ver a Bob Dylan.