Teoría da cor de Visa

Goethe escribiu un tratado titulado “Teoría da cor” ao que non se deixa de acudir como texto fundacional da psicoloxía da cor moderna. Hainos de maior rigor científico, pero non serven para nada (reduccionismo científico); deseñadores e publicistas en xeral apóianse consciente ou inconscientemente nel (co seu tamén de reduccionismo, qué remedio). Unha especie de biógrafo chamado Johann Eckermann refire a seguinte cita, que demostra o valor que o autor do Fausto lle conferira ao seu estudio:

“De todo o que fixen como poeta, non obteño vanidade algunha. Tiven como contemporáneos bos poetas, viviron aínda mellores antes ca min e vivirán outros despois. Pero ter sido no meu século o único que veu claro nesta ciencia difícil das cores, delo vanaglóriome, e son consciente de ser superior a moitos sabios”.

Os da tarxeta Visa e Pantone alíanse agora, 200 anos despois, para actualizar o traballo do humanista alemán, enfocándoo ao home consumidor no que nos convertemos. Nesta captura da web de Pantone (clic para ampliar) pode lerse a explicación de qué cor (perdón, qué pantone) é a túa segundo o tipo de gastador que estás feito; explicación que encabezan cunha frase moi dos nosos fascinantes días: Style. It's not what you do. It's how you do it. Réndanse.

E vaian escollendo, que o Nadal xa está aí.