Autorretrato de Jerry Miller

O do escudeiro de Eilen Jewell é un xeito de tocar rico, discreto e dialogante; contención e liberdade. Nada de masturbarse ante o espello da caterva, non é o pistoleiro máis rápido do oeste nin ganas, non, a vida non é longa, pero se non che importa, gustaríalle tocar ben esta canción. Sombreiro de angulosas sombras na faciana loira e seca, quizais algún día salgada, todo o que che podería interesar del xa o contou Faulkner, non te molestes porque os ollos están ao fondo.

Falei del noutras ocasións contando o mesmo, só quería poñerlle algo de letra ao vídeo que topei esta noite, unha gravación de estudio de Sweet Rose na que se pode apreciar o talento do guitarrista, esta vez tocado de pucha, servindo á rapariga.
_