O indomable iPhone 5 de Mao

Hoxe é día de nervios para adictos aos produtos Apple, que non teñen por que ser maqueiros, ou si, e axentes de bolsa. As 7 da tarde é a hora. A compañía non desvelou se presentará un iPhone 4 mellorado e máis económico ou o iPhone 5. Ao mellor é porque nin eles, nin Tim Cook, o saben. Tim Cook, por certo, O Herdeiro, parécese a Bill Gates, O Filántropo, pero non o comenten por aí que poden arruinarlle o negocio. Os nervios son exclusivamente occidentais, eso si, porque os chineses, tan crecidos eles, xa andan co iPhone 5 dende hai semanas, e por 32 euros.

Algúns, pagados por Apple, como lles gusta proclamar a moitos gallardos antisistema dixitais, aseguran que o iPhone 5 da China píllase sen garantía e cunha “indomable pantalla táctil resistiva”. O de indomable pase, pero que sexa "resistiva" é como para preocuparse, a ver qué perigoso xoguete colles coas mans. Pode que o armara O Gran Temoneiro.
_