Se o que lle interesa é a guerra ou a saúde

Continuemos coas nosas clases de botica. Hoxe tocan unhas pastillas ás que lle puxeron de nome, non sen moita retranca, Lyrica. Mañá vostedes entran en guerra cun país, o que máis rabia lles dea, eu que non teño interés en non ser previsible vou escoller EE.UU. Vale. Que armas empregaría? Bombas nucleares, bacteriolóxicas, avións kamikazes, kalashnikov? Non, unha pastilla desas na Coca-Cola dos soldados e ás dúas horas o Pentágono sácame a bandeira branca, se é que dan. Rendición incondicional.

O prospecto é para enmarcar como exemplo de literatura farmacéutica, e non minte. A muller chama por teléfono para dicir que se vai matar na autoestrada por culpa da pastilla. Un opiáceo para corrixir, que non aliviar, unha doenza de columna.
_