Bestas inquedas antes da pronunciación

Están animadas as rúas con tantas manifestacións que debemos saber a que indignada turba nos unimos. O outro día, logo do comunicado de ETA, despisteime, e cando me din conta estaba insultando a Zapatero cos da AVT, porque a Conferencia de Paz de Donostia era “un insulto ás víctimas”, “a culminación dun proxecto negociado entre ETA e o Goberno”. Poden preguntarlle ao experto na (anti)materia, Jaime Mayor Oreja, que alí estaba acompañado de Iturgáiz, o eurodeputado, Rosa Díez, para quen o loito non exclúe o fashion, e outros persoeiros da democracia. Nun intre de silencio sobrevoounos o riso de Savater como a lingua do Espírito Santo.

Aproveitei a euforia para entrar nunha librería e mercar o último libro de Aznar, para que mo asinara, pero por problemas de axenda non puido asistir. Josemari sin Complejos de Botella y Montaraz está madurando as súas palabras en Praga, case se pode escoitar no ar o ferver do seu pensamento, como as entrañas da terra antes de vomitar lava.
_