Agora en cómodas monodoses

O traxe de don Xerar Ilusión arrasou o Día de Galicia. Saíu da trastenda, das compulsadas sombras do Pazo de Raxoi, co bastón de mando por diante, tentando as pedras da praza, falsas dende a acampada dos indignados, e con ricto desafiante, abano duns labios que pechaban o triste, o rexio e o asasino. O xilófono non se comparte. Os fotógrafos botáronse a el como se da princesa ou Carla Bruni se tratara. O Correo enarborouno como bandeira dun galeguismo non excluínte, o de Feijóo e Castelao (poden preguntarlle), o bo.

Nunha redacción sen eruditos dispostos, o xornal compostelán recorreu aos comentarios dos lectores en internet para certificar as súas teses galeguistas e, cunha pluralidade que o honra, citou tamén a un que criticaba a indumentaria por incorporar gravata e prescindir da faixa; sectario ou purista? Xulguen vostedes.
_