Qué farías se che saíra un fillo socialdemócrata?

A qué rapaz de 15 anos lle pega por meterse nas xuventudes dun partido socialdemócrata? Non só a familia ten que estar moi mal. Anarquista, comunista, altermundista, enténdese, un póster de Muse ou Shakira ou Ronaldo ou Rosalía de Castro, nazi, enténdese, pero nunca socialdemócrata, nin democristián. Soldadiños loiros formando brandamente encadeados ao pescozo polos seus xerseis de marca, cando se xuntan.

Nazi ou nazis parecen ser os responsables da matanza de Oslo, aínda que, como sempre, de entrada deixaron correr a posible autoría dunha célula islamista.

A inmigración é un problema que non é un problema para os grandes partidos europeos, que así poden adicarse, entre outras gratas tarefas, a alimentar a máquina xeracional.

Respostando á pregunta do título, eu, logo de preguntarme cómo puiden deixalo chegar a esos extremos, probaríao todo: a psiquiatría, o tinto (para el e para min), a chantaxe, se deixas eso cómproche a moto, non me podes comprar así, papá, a min non me deas clases, mocoso, que te fendo, nin o tentes, a violencia ademais non conduce a nada, a ver, explícame eso de que non conduce a nada, déixao, por favor, e respecta as miñas ideas como eu respecto as túas, o que hai que oír, Carme, cómo criamos este monstro.
_