O bombo aínda non fixo declaracións

Fontes gubernamentais confirman que, tras o consello de ministros desta mañá, o presidente da nación reuniuse co presidente da Federación Española de Fútbol para falar do ERE que as arcas públicas obrigaban practicarlle a Manolo o do Bombo. Tras un tenso e longo xantar, o presidente en funcións, o da nación, facendo gala da súa salomónica intelixencia, comunicoulle aos medios que Manolo o do Bombo, como único representante dos ánimos españois, era imprescindible, polo que decidía prescindir só do Bombo.

A medida, salomónica, si, máis ou menos, pero ferinte, foi acollida con receo por parte dalgúns sectores da sociedade. O presidente da Xunta de Galicia, Alberto I O Austero, sacou a todos os gaiteiros que tiña dispoñibles ao Obradoiro en sinal de protesta polo que considera unha flagrante amputación do Estado de Benestar.
_