Días de Essex

Este vídeo é un adianto do novo traballo dun dos nosos xenios favoritos, Darren Hayman. Sairá á venda en outubro co título de “Essex Arms”, asinado como Darren Hayman and The Secondary Modern. Seica agora quere completar unha triloxía sobre a súa terra natal, ao leste de Londres, onde, tras a Segunda Guerra Mundial, construiron os novos pobos, pequenas cidades de intención racionalista que para el representan “boas ideas que saen mal”. Sen a inmediatez urbanita de Hefner, co talento intacto, reláxase con cancións que falan da vida rural inglesa, por eso mantén o formato pop, pero máis a modo, vernizado de folk.

Aviso para conductores, ingleses ou non: o ano pasado Hayman foi agredido e atracado cando regresaba dun concerto en Birminghan á sua casa londinense; a malleira, con mazaduras e fracturas de cine, deixouno en absoluto repouso durante seis semanas. Din que non tivo nada que ver co concerto, así que vaian con coidado por esas estradas asfaltadas polo novo laborismo. A non ser que se chamen Bono ou Sabina, xa saben.
_