Un inimigo co que non podería Robe Iniesta

Este vran escribe Sergio Makaroff en ou para Efe Eme, “diario de actualidade musical”. Descoñezo se hai edición impresa. Nunha sección que titula Gigantes y Molinos, menciona todos os martes algúns dos seus gustos e o que el considera tesouros discográficos. Unha boa pequena lectura para calquera estación do ano, recomendámola encarecidamente. Non sorprende no mellor sentido da expresión: unha prosa livián, desacomplexada e divertida (para o lector e fixo que tamén para o autor) que deixa entrever unha cultura, unha experiencia da vida, fondas (aí queda eso!).

Vai pola quinta entrega. Xa falou dunha chea de artistas e grupos, vivos e mortos, algúns sobradamente coñecidos e moitos que non os coñece nin a súa nai á hora de xantar; sempre interesantes. Non pretende o arxentino sentar cátedra, é que, como canta nunha canción, ten un corazón de ouro macizo e quere compartilo; que é broma, non vaian crerse todo.
_