O vórtice dos árbitros

Hai un lance do fútbol que non entederei xamais, que os xogadores e mesmo os adestradores, non importa o equipo, vaian queixarse ao árbitro polo que pita pretendendo convencelo de que se trabuca. Que blasfemes, que dispares contra todo aquel ou aquela (máis frecuente, que se lle vai facer) que gardas na recámara ata que te saca cartón vermello como un xuíz dicta sentencia inapelable e golpea o mazo, enténdoo: estás quente; pero reclamarlle unha rectificación está máis que demostrado que é unha idiotez inútil (no suposto de que hai idioteces útiles).

Recoñezo que eu tamén os insulto pola tele (xa non estou para ir a Balaídos), e como debe ser, con vehemencia e sen imaxinación, aínda que logo se me pasa porque estou convencido de que son humanos, chegando a defendelos coa mesma vehemencia diante dos que avogan polo uso da tecnoloxía nas xogadas dubidosas.
_