As insinceras enquisas

Hoxe publican en Vieiros algúns datos do último barómetro autonómico do CIS (Centro de Investigacións Sociolóxicas, non confundir con CSI Las Vegas, que a min xa me ten pasado). As enquisas deste tipo de órganos independentes, como calquera enquisa, vendidas como instrumentos de rigor científico, son por natureza reviradas e tendenciosas. Feijóo sabe algo do tema. Rigor. Rigor mortis. Os vascos son máis independentistas que os cataláns, que á súa vez sono máis que os galegos. Algúns están “bastante orgullosos” e outros “moi orgullosos”.

Eu son independentista os días que os independentistas non me dan a vara; os meus medos non atopan refuxio en bandeira ningunha, nin biblia nin logo(s). Síntome galego (100%, como a rubia galega, o porco celta ou os percebes do Roncudo), non orgulloso de ser galego. Síntoo (un pouco).
_