A publicidade en Galicia (extracto da Obra Magna de Herr Professor Aquiestamus)

Os lectores de Vieiros xa saben, ónde vai, que o seu xornal dixital pechou o día 24, véspera do Día Nacional. Puideron exporlle unha OPA hostil desas a La Voz de Galicia para mercala, pero preferiron diluírse no baleiro dun mercado inmovilista:

- As subvencións non son para axudar aos emprendedores que andan coa idea de crear riqueza no país a partir da ousadía, o sentido, a imaxinación, o coñecemento, o traballo, o respecto e a responsabilidade. E? Qué di este? Está drogado?

- As subvencións son para os amigos, e as subvencións máis cativas, o solto, para os medios desafectos e a farándula (así irán entrando en razón).

- O da publicidade é un mercado enganoso. A xente olla o spot que gañou o último festival de publicidade de Cannes e aplaude pampa, qué moderno, qué orixinal, qué atrevido, pero pasarán moitos, demasiados anos, antes de que un empresario local comprenda que ese tipo de publicidade, ou outra, si é posible, que non ten porqué ser cara e o target está aí agardando.

- Qué fisno, o target. Primeiro soltas o anglicismo, e se o empresario non sabe o que é (que xa ven sendo raro, porque as parvadas aprendémolas rápido), pois mellor, porque entón lle traduces o de mercado obxectivo e mercado meta. Pero eso seguro que é moi caro e os nosos clientes non, non... non lles vai gustar. E pasaron 50 anos e aquí estamos, hai que ser serios, ¿anunciarse en Vieiros? Ti... ti estás drogado, ti estás moi drogado, ti qué te metes, meu fillo.

- Quén se anunciaba en Vieiros? Os que non tiñan cartos. O empresariado mundial dá noxo. O empresariado galego só gañas de abrir unha fiestra para respirar. Os fillos con acceso a educación daqueles que fixeron cartos sobre a emigración e a explotación non soen saírse de dúas pautas marcadas: continuar co mesmo modelo ou perderse nun fachendoso malgasto persoal.
_