Unha enquisa preto do Olimpo

“Para compensar la falta de apoyo recibido en su campaña, el PP de Madrid encargó a NC Report una encuesta en la que se daba a conocer que siete de cada diez españoles están en contra de la subida del IVA y opinaban que el alza fiscal no servirá para reducir el déficit.”

O parágrafo extráese dunha nova sobre a recollida de sinaturas auspiciada pola Comunidade Autónoma de Madrid (moi orgullosos de ser madrileños, reflectía innecesariamente a enquisa do outro día) contra a subida do IVE, que casualmente lles preocupa tanto como minar a imaxe de ZP. Non me parece mal; como se envían aos exércitos de terra, mar e ar a desaloxalo da Moncloa (sen complexos, diría Aznar, aforrándose o gasto en furgallas cargadas con caixas de folios lixados). O problema radica na enquisa, nas enquisas das que estamos a falar; quén as paga, os afiliados do partido interesado ou a cidadanía? Sobran recunchos xurídicos para dictaminar que os afiliados, non teman, os cartos dos contribuíntes están ben empregados.

A Excma. Señora Dona Esperanza Aguirre, gaivotas nos calcetíns, chulapa-pegaso con pulseira olímpica, ademais, ben pode aducir que os afiliados do partido interesado e a cidadanía forman un mesmo conxunto homoxéneo, porque todos os españois saben que a alza fiscal non servirá para reducir o déficit. A lo menos os españois de Madrid. Os de aquí non sei; habería que preguntarlle a Feijóo, encargar unha enquisa.
_